Verse

 

 

 

S’Motto (Ei du schöne)

 

Uf em Bou isch s’Motto hüür

D’Verchleidig chunt Di do nit tüür

Und ou dr Obernarr passt guet

Vom Gmeinrot isch er, das brucht Muet

Und suffe duet är mängisch ou

Grad so wie früecher uf em Bou

 

Jetz het är gwächslet, uf Chlausthaler

Wird dä äch so, e chli normaler.

 

 

Hesch Froue i dr Gruppe

 

Mir si bau lei mit Schnitzubänk

Döu chöme nüm, Dir wüsset’s dänk

D’Rätschywiber, die hei gschriebe

Sy wöue nüm as Fasnachtstriebe

Und d’LOV die Chline, dasch e Truppe

D’Höufti Schwanger y der Gruppe.

 

Tüe mir haut hüür mit Gruppe spare

Derfür git’s Nachwuchs bi de Obernarre.

 

 

 

Immer wider

 

Dr Meyer Adolf sisch de wohr

Dä g’heit uf d’Schnörre, Johr für Johr

Ob z’Fuess mit Velo, mit Schprützkanne

Im Dorf gsesch luter Meyer-Wanne

Y Küss dr Bode, bi kei Bänz

Und mach am Papscht nur Konkurränz.

 

Doch d’Ambulanz chunt mit Getöse

Är chön de jetz, es Abo löse.

 

 

Was bringsch wird g’hout

 

Am Bring und Holtag wird grilliert

Dr Moser Ueli organisiert

E Gasgrill lad dä us em Charre

Hout d’Fläsche Gas, jetz lueg dä Schmarre

S’het eine gmeind, dä Grill sig aut

Und het em ne ganz eifach klaut

 

Är het ne gfunge, Dank mne spurt

Chunt zrugg do isch Gasfläsche furt.

 

 

Fausch Agleit

 

Dr Faccioli chouft La Cost

Dir gloubet nit was das dä choscht

s’Krokodil treitt är am Rügge

so Libli hei haut Ihri Tücke

üs het’s zwar g’freut, weisch Mario

am liebschte gseh, mir Di ou goh.

 

Chouf nur no Hemli y ab morn

D’Grawatte chunt de eifach vorn.

 

 

Üsi Dame

 

Dr Dameturnverein het Fescht

ar Spartakiade, z’Budapescht

s’Wüetrich Meggi, wot s’Wasser löse

e Chlapf e Schrei, es morts getöse

mi ghört nur no, es churtses Rüssle

do lit’s am Bode, mit samt dr Schüssle.

 

Kleider nass und s’Gsicht verbleicht

hät gschider grad y d’Hose gseicht.

 

 

Überlade

 

Dr Bernasconi fahrt im Lift

Is UG abe wie ne Stift

Mit em Stapler öbbis hole

Wod zrugg, ghörsch ne vo unge jole

Dr Lift louft nüm, s’Problem isch schlicht

Dr Stapler het, ou läär z’vüu Gwicht.

 

Si hei dä Charre, nach paar Tage

Ufe zoge, mit Kranwage.

 

 

 

Z’lang Trunke

 

Dr Rütsche wot zum z’Nacht es Gnagi

Im heisse Wasser, weisch das mag y

Goht schnäu i Krone zum ne Bier

Us eim sy sofort haut de Vier

Geit hei es bitzli wacklig z’Fuess

Und Gnagi si de nur no Ruess.

 

Merk es Dir, wär vüu z’lang trinkt

Isch säuber tschuld, wenn d’Wohnig stinkt.

 

 

 

E schwäri Wahl (SBB)

 

Ig bi uf d Poscht mit em Kuvert vo de Nationalrootswahle

Dr Dreier seit, das isch vöu z’schwär, do muesch es Päckli zahle

Was hesch de Du i dämm Kuvert mit söfu Gwicht do drinn

E grosse Chopf, e dicke Buuch, für e Wittwer Max e Schtimm.

 

 

 

Wenn meinsch

 

Dr Waschu Jean-Pierre lot si Chlapf im Winter duss lo stoh

Bim Rössli hout är ne de ab, Promill hei noche gloh

Entischer-Spray, mit Füürzüg und heiss Wasser drüber gosse

Das Schloss isch gar nit gfrohre gsi, denn Türe isch nit bschlosse.

 

 

D‘Uflösig

 

Senil, chli Gicht, dr Schlotteri, ganz Grau und Prostata

Vergässlich, auters Zucker, schlächti Zäng, ecetera

Wenn jede no zum Dokter gieng, dä würd no füu me finge

Dr Männerchor dasch aune klar dä cha ne so nüm singe.

 

Uf dr Jagt

 

Somaini Franz und s’Marianne, die hei es ganz nöis Hooby

Si seckle rings um’s Huus, uf d’Stroos, benäh sich wie dr Glooby

Mit Bäse und mit Tüecher fuchtle si ganz wüud die Zwo

Geisch nöcher gsehsch die wei jo blos es Chüngeli y foh.

 

Ir höchi

 

Letscht Johr ar Autlütefahrt ischs Ziel de gar höch gläge

Hesch Du uf die Reis wöue goh, vom Dokter bruchsch dr säge

Für die wo mit si oni das dä Arztbsuech si hei gmacht

Git’s vor dr Abfahrt no ganz churtz e ökomenischi Adacht.

 

Päch gha

 

Vorus isch's chaut, es taget scho Schnee lit uf de Schtroosse

Dr Dysli wott no schnäu e Wäg id Induschtrie ie schtoosse

Dr Richard wartet scho dehei, do räbblets wie ne moore

dr Hampe chunnt mit em Traktor zrugg dr Pflueg het är verloore.

 

Die schlaue Amis

 

D’Amis flüge uf e Mars, mit Spirit si si glandet

Si mache Fotos überall, uf d’Ärde wärdes gsändet

Dr letschti Egge wird dürsuecht, die Kamera vou glade

Los Busch dört fingsch ne sicher nit, dr Osama bin Lade.

Dr Gmeins-Ausflug

 

Si fahre mit der SBB, nach Ligerz guet go ässe

Bii Wiiswi, Marc und Träberwurscht, das Gmeinseländ vergässe

Dr Bianchi luegt im Fahrplan no, wenn dr letschi Zug tuet fahre

doch dä isch furt und d Froue hole die Süffle mit em Chaare.

 

Mir arme Luterbacher

 

E jede bringt vom Wasseramt, si Ghüder zum verbrönne

Die ganzi Schwitz wot's Houz versage, kei Rhuei wei si üs gönne

Doch was üs würklich schampar störrt, die Deitiger si Lumpe

düe eifach y zwöi grosse Rohr, dr Schissdräck zu üs pumpe.

 

Ehret das Alter

 

Dr Schwaller geit am Obe spot, is 33-gi abe

Vilicht gfaut mir jo dört e Frou, süsch du mer eine lade

Doch was mir nit verstöh het dä, nach aute Wyber Hunger

am angre Tag verwacht dr Hugo bi dr Wittwe Brunner.

 

Am fausche Ort

 

Wenn wotsch Nationaurot wärde, bekannt bisch wie ne grosse

dr Max dä geit uf Gerlafinge, wot zu de Genosse

är isch richtig überrascht, im Saal het das viel Lüüt

das isch ou kei SP-Versammlig, Raiffise -GV isch hüt

 

 

s‘ Safari (Mani Matter/Coiffeur)

Im Safari bin ig gsässe, trinke Coca Cola light

bschtöu italienisch Pizza, hoffe nid das abverheit

Giovanni, una Pizza, ma subito, dalli, dalli

ig verschtoh nid italienisch, mi Name dä isch Ali.

 

s‘ Chrüz

Im Chrüz do bin ig gsässe, han es Haubeli vor mir

das Haubeli schmöckt wunderbar, viel besser als es Bier

won ig ha müesse zahle, chunnt bi mir dr Träne-Reiz

ig zahl jo nur es Haubeli und chouffe nid die Beiz.

 

d‘ Chrone

Ir Chrone bin ig gsässe, trinke Molke usem Glas

will das sig gsung für’d Bildig vom körpereigne Gas

das gsesch de ou de Jasser a, die rütsche hin und här

wenn z’lang ufem Arsch blibsch sitze fallt d’verdouig halt ou schwär.

 

s‘ Rössli

Im Rössli bin ig gsässe, ha ne Tulpe do vor mir

ig gschpüüre Angis Fudi i mim Rügge hingerfür

Dr Hugo chunnt zur Chuchi us, e Scheitle wie dr Fritz

Hüt obe geit’s de nid so lang, wöu hinech bin ig schpitz.

 

 

 

s‘ Pöschtli

 

Im Pöschtli bin ig gsässe, ha ne Schtange a dr Bar

s‘ isch eifach nümme s’gliche wies bim Rüedu einmal war

und wenn mi Schatz weiss, dass ig dört bi, chunnt si mir gemein

Appettit darfsch dir dört hole, aber g’frässe wird deheim.

 

 

d’Moral vo dere Gschicht

 

Im Safari isch dr Ali und im Chrütz söttsch nit z’viel sufe

Ir Chrone hesch nach Molke Luft im Ranze ganz e hufe

Im Rössli gschpüürsch Du Anschis Fudi wie ne fini Rose

Und im Pöschtli y dr Bar hesch d’Stange y dr Hose.

D’Bundesrotswahle (Kriminal-Tango)

D’SVP het d’Wahle gwunne

Si verträtte ou die Junge

Und die Arme und die Aute

Für die isch d’SVP ou do.

D’Froue stöh uf starchi Manne

Do isch sicher öbbis dranne

Dr Blocher dä müesst Dir hüt wähle

Und derfür muess öpper goh.

 

Bundesrotswahle-üsi Regierig

Blibt aus bim aute-git’s nöii Gschtaute

CVP Wähler-si bau am Schwanz

Eine muess use-s’gilt Konkordanz.

 

Bim Herr Blocher si mir ghaute

Är isch nid arm, derfür en aute

Metzler Ruth isch jung und wiiblech

Die Frou muess furt es isch en Hohn

D’SVP und rächti Herre

Wähle se ab chasch Di nid wehre

Der für chunt Unternähmer Blocher

Guet geit dä gli id Pension.

 

 

Bundesrotswahle-üsi Regierig

Blibt aus bim aute-git’s nöii Gschtaute

Politischi Froue-bruche vüu meh Biss

Nume zum Schaffe-das isch doch Bschiss

 

Bim Freisinn sötsch öbber wähle

Do näh mir doch e Blocher gääle

Im Dritte Waugang isch es klar gsi

Frisst dr Merz das Beerli uf

Merz mach links kei Kapriole

Dr Blocher rächts no überhole

Die zwe stöh für’s Schwitzerländli

Üs verschlot das fasch dr Schnuuf

 

Bundesrotswahle-üsi Regierig

Blibt aus bim aute-git’s nöii Gschtaute

S’git wieder Wahle-doch dasch einerlei

Die Kumpanei-geht nie vorbei,

geht nie vorbei, geht nie vorbei!

 

Im Gmeinrot (Die zwei Wölfe)

Im Gmeinrootssaal isch e Zirkus z Gascht

E Diräkter, Glön und Goukler, hei dört obe Rascht

Si hei fasch ke Gäud und das isch würklech schlimm

I dämm ganze Zirkus isch dr Holzwurm drinn

Dr Holzwurm dä isch drinn

(Pfeiffen)

Sit dr Holzwurm drinn isch louft im Zirkus chrumm

Worum worum worum worum worum worum worum

Loufts im Zirkus chrumm

 

Die zwe Glön bhoupte üse Diräkter seit e Mischt

S Läbe mit em Holzwurm, das sigi würklech Trischt

Dr Diräkter frogt sis Publikum wie Ihne das tät gfaue

D Glön si dr Meinig, dere Umfrog chasch nid troue

Dämm ganze chasch nid troue

(Pfeiffen)

Die Umfrog isch e Bschiss, die verchoufe üs für dumm

Worum worum worum worum worum worum worum

Verchoufe die üs für dumm

 

Dr Diräkter seit: die zwe Glön chöi nume Trotze

Öich chunnt nüt säuber z Sinn, nume ume Motze

Das ewige gnürz macht eim längwilig a

E Teil vo de Goukler het scho gschloofe

gha

Die hei scho gschloofe gha

(Pfeiffen)

Die Glön si luschtig wie nes Narkotikum

Worum worum worum worum worum worum worum

Si Glön wie Narkotikum

 

Me setti sech im Zirkus nid uf ei Schtar verloh

De chum isch dä wäg, tuet ke Schtutz me ine cho

Und angrersitz sött nid z‘viel Sagmäu is Getriibe

Süsch wirsch immer am gliiche Ort stoh bliibe

Mir wei jo nid schtoh bliibe

(Pfeiffen)

Sit dr Holzwurm drinn isch, louft’s im Zirkus chrumm

Dorum dorum dorum dorum dorum dorum dorum

Loufts im Zirkus chrumm,

Jo es louft chrumm